អន្តរជាតិ៖ អ្នកនាំពាក្យក្រសួងការបរទេសចិន បានលើកឡើងថា សហរដ្ឋអាមេរិកកំពុងលេងសើចជាមួយនឹងសង្គ្រាម ហើយបង្កើតភាពតានតឹង" ខណៈដែលទាហានរុស្ស៊ីជាង ១៥ម៉ឺននាក់នៅតែត្រូវបានប្រមូលផ្តុំនៅជិតព្រំដែនអ៊ុយក្រែនបន្ទាប់ពីការប្រកាសរបស់ទីក្រុងម៉ូស្គូអំពីការដកថយមួយផ្នែក។

បណ្តាប្រទេសលោកខាងលិចបានស្នើឱ្យមានការគ្រប់គ្រងអាវុធ និងជំហានកសាងទំនុកចិត្ត ដើម្បីកាត់បន្ថយការប្រឈមមុខដាក់គ្នា ដែលបានជំរុញឱ្យពលរដ្ឋរបស់ពួកគេចាកចេញពីអ៊ុយក្រែន ដោយភ័យខ្លាចពីការវាយប្រហារដែលអាចកើតឡើងខណៈ រុស្ស៊ីនៅតែបដិសេធថាខ្លួនគ្មានផែនការឈ្លានពានទេ។

អ្នកនាំពាក្យក្រសួងការបរទេសចិន លោក Wang Wenbin បានប្រាប់អ្នកយកព័ត៌មាននៅក្នុងសន្និសីទកាសែតប្រចាំនៅទីក្រុងប៉េកាំងកាលពីថ្ងៃពុធថា ការនិយាយបំភ្លៃ និងព័ត៌មានមិនពិតជាបន្តបន្ទាប់ដោយប្រទេសលោកខាងលិចមួយចំនួននឹងបង្កើតភាពចលាចល និងភាពមិនច្បាស់លាស់ដល់ពិភពលោកបង្ករឱ្យមានបញ្ហាប្រឈម។

លោក Wenbin និយាយថា លោកសង្ឃឹមថាភាគីពាក់ព័ន្ធនឹងបញ្ឈប់ការផ្សព្វផ្សាយព័ត៌មានមិនពិត និងធ្វើអ្វើជាប្រយោជន៍ដល់សន្តិភាព និងកិច្ចសហប្រតិបត្តិការ។

អ្នកនាំពាក្យលោក Wang បានលើកឡើងថា៖ «ការដឹកនាំរបស់ប្រមុខរដ្ឋទាំងពីរ ចិននិងរុស្ស៊ី តែងតែធ្វើការដើម្បីអភិវឌ្ឍភាពជាអ្នកជិតខាងល្អរយៈពេលវែង និងទំនាក់ទំនងសហប្រតិបត្តិការដែលមានផលប្រយោជន៍ទៅវិញទៅមក ដោយឈរលើមូលដ្ឋាននៃការមិនចងសម្ព័ន្ធភាព ការមិនប្រឈមមុខគ្នា និងមិនកំណត់គោលដៅរបស់ប្រទេសទីបីឡើយ»៕